انا ضابط شرطة وافتخر

أنا ضابط شرطة
أنا ضابط الشرطة إللي دخلت كلية الشرطة و كنت جايب 92%.. للأسف
أنا إللي قضيت أربع سنين أصحي الساعة 6 الصبح غصب عني و أتبهدل و أتعلم إزاي أتحكم في نفسي علشان يوم زي إللي إحنا فيه ده
أنا إللي عديت السنين دي ولا كان همي إني أطلع بطاقة
ولا رخصة ولا إني أتحكم في حد أو أتنطط عليه.. ولا كان نفسي أظبط واحدة فى
كمين ولا ألبس نضارة شمس ولا أضرب واحد بالقلم.. والله كان كل إللي جوايا
إني أعمل حاجة عشان أحس بإني ليا لازمة في البلد دي.. إني أشوف نظرة ف عين
واحدة ست أد أمي جبتلها حقها من إللي قتل إبنها.. إني أجيب لواحد إتسرق
الحرامي إللي سرقه.. إني أحمي واحدة زي أختي إنها تغتصب.. إني بس أشوف
النظرة دي فى عينيهم حتي من غير ما يقولوا كلمة شكر
أنا إللي إتخرجت النهاردة و اشتغلت تانى يوم
أنا إللي اتسحلت شهر كامل كل تعاملي مع مجرمين و مسجلين و حراميه و بعد كل ده رجعت لأبويا بقول له الحمدلله قبضت 465 جنيه..
أنا إللي اتضرب عليا نار و اتحطت علي راسي طبنجة عشان أسيب واحد محكوم عليه و مارضيتش
أنا إللي كنت واقف لوحدي قصاد تاجر مخدرات معاه سلاح آلي و ما جريتش
أنا إللي دخل لى محامي و حط علي مكتبي 25 ألف جنيه عشان أمشي تاجر مخدرات و رفضت و كنت لوحدي في القسم ولا كان حد هيعرف حاجة و برضه رفضت
أنا إللي فضلت بايت مع جثة مقتولة في مكان مهجور من
الساعة 11 بالليل لحد الصبح و فضلت شغال 44 يوم من غير ما أروح بيتي منهم 4
ايام والله فى الشارع من غير ما أنام علشان أجيب إللي قتله
أنا إللي اشتغلت ف قضايا سرقة بالملايين و رفضت مجرد هدية من الراجل إللي اتسرق لما جبناله فلوسه
أنا إللي إتأمرت بإني ألفق قضية مخدرات لواحد برئ و رفضت و اتأذيت ف شغلي عشان رفضي ده و فضلت مصمم إني معملوش حاجة
أنا إللي كنت بآخد الحرامي تحت دراعي و أدخله الحجز
بإيدي و أدخل السجن من غير سلاح ولا كان واحد يستجري يقرب مني مش بالضرب و
التعذيب لا بالهيبة و الاحترام
أنا إللي لما عملوا إضراب في السجن فكوا الإضراب لمجرد إني دخلت ليهم
أنا إللي لما واحد حاول يقتلني من ظهري فى الشارع واحد مسجل خطر هو إللي منعه علشان كان معروف مين أنا
أنا إللي شغال بقالي 5 سنين و كل شهر بروح لأبويا آخد منه فلوس علشان أعرف أعيش
أنا إللي بآخد اجازة كل سنتين تلاتة ولا حد بيفكر يسأل علي اجازاتي
أنا إللي بيتقال عليا خائن و عميل
أنا إللي هربت المساجين و ضربت المتظاهرين و سرقت كارفور و أركاديا و أنا لابس مدني و ضربت نار فى الشوارع علشان أروع الناس و أخوفهم
أنا إللي قتلت أنا إللي دبحت أنا إللي اغتصبت البنات عند الدائرى و المحور
أنا إللي جبت خيول و جمال و رحت بيهم التحرير
أنا إللي حرقت الأقسام وقتلت الضباط زمايلي و العساكر بدون رحمة
أنا إللي خنت البلد دي...البلد إللي عشت و اتربيت و عانيت فيها أكتر من أى واحد فيكوا
أنا ابن الكلب المرتشي إللي عمل كل ده و اكتر بكتير
أنا إللي زميلي انا اللى زميلي اتاخد منه 20 جنيه ف
لجنة شعبية في المرج من 4 ايام و قالوا له ماهو لما كانت الشرطة ماسكة
الاكمنة كانت بتاخد مننا فلوس
أنا إللي زميلي كان معدي ف لجنة شعبية ف المعادى
(المعادي مش الخصوص ولا شبرا الخيمة) و أول ما طلع كارنيه الشرطة قالوا له:
(إيه ده؟ هو إنت من ولاد ال.....؟؟) الله عليكوا
أنا إللي زمايلي اتقتلوا في الأقسام يوم الجمعة
أنا إللي أول ما وصلت القاهرة كل أهلي و اصحابي قالوا لي اختفى و لو حد كلمك ولا سألك ماتقولش إنك ضابط شرطة
أنا إللي واحد من الناس قال لى النهاردة أنا كل ما بشوف ضابط شرطة فى الشارع بافتح شباك العربية و أتف عليه
أنا إللي لما بقول و بذكر الناس بالشهداء إللي ماتت
من الشرطة -مع كامل احترامي للناس إللي ماتت في التحرير- يتقال لي : أحسن
بتوع الشرطة دول مش مشكلة
أنا ضابط شرطة محترم كان كل أملي إني أحقق العدل و القانون و أحمي الناس
أنا إتبعت و إتخنت زيي زيكم بالضبط و مع ذلك اتقال عليا كل ده

أحب افكركم بس بحالة ضباط الجيش في سنة 1967 بعد ما صدر لهم
قرار الانسحاب الغير مدروس و حصلت النكسة و الناس كانت بتعاملهم إزاي..
الفرق الوحيد إن ضباط الشرطة عمر ما هتجيلهم 1973 عشان ترجعهم أبطال تاني..
الفرق الوحيد إن أنا و زمايلي إللي عانوا و شافوا أكتر منى بكتيييييييير و
خبرتهم أكتر مني بكتييييييييييييييييييييييييير حنفضل كده , للأسف
................
كاتب هذا الموضوع أحد الضباط الشرفاء الذى يروى ما حدث له
بالفعل وليست هذه الأحداث تنطبق على كل الضباط يا جماعة اكيد فى الخير
واكيد برضو فى الشر ....بس احب اقول ان الخير لسه موجود ومصر هتفضل فى خير
وسلام ...

تحياتى لكم
ra3d

جميــــــــــــــل يا رعــــد..تسلم ايــدك..ويااارب الاحــوال تتصلح

خيـــر باذن الله

اقتباس :: أنا إللي كنت بآخد الحرامي تحت دراعي و أدخله الحجز

ليه داخل ببطيخه حضرته Very Happy

تسلم ايدك يا رعد وربنا يكتر من ضباط الشرطه الشرفااااء

يااااااااااااااااااااااااااااااااارب

تسلمو يا شبااااااااااااااااااااااااااااب

» ضحية جديدة للشرطة.. ضابط يعذب عجوزاً لاعتراضه علي اعتداء المخبرين علي ابنته
» شرطة إيطاليا تقرر مكافأة شرطية "عذبت" إيتو لمدة 15 دقيقة