سياده الريس مش المخلوع

]

سياده الريس مش المخلوع

كان نفسى اقدر انزل الميدان زى غيرى واعيش اللى عاشوه مش مجرد حكاوى وقصص بسمعها وبشوفها على النت او على التليفزيون
كان نفسى بجد انزل واخد رصاصه واموت والابتسامه على وجهى
لمجرد انى فديت بلدى بروحى وفديت اهلى
ودخلت جنه الشهداء
موضوعى مش ليك ولا ليها موضوعى
ليه هو
حوارى معاه هو
عايزين تعرفوا هو ده يبقى مين
هو
يبقى
سياده الريس مش المخلوع
بص ياريس
ومتخلينيش اجى يوم وقولك سياده الريس المخلوع
اجى يوم واقولك ارحل ارحل مش عيزينك
اجى واقولك فليسقط نظامك
سياده الرئيس
انا مجرد مواطنه مصريه
ليست مصر بالنسبه لى مجرد بلد ولدت فيها واخدت جنسيتها
مصر دى الامن والامان ...الحب والسلام...الخيروالوئام...الكرم والحنان
مصر حاجه متتوصفش
سياده الرئيس
انا مصريه وروحى فداها ....لوطلبت روحى روحى ماتغلاش عليها
سياده الرئيس
اتمنى ان تتعظ مما حدث فى العهد السابق
اتمنى ان تنظر حولك وترى ان كل مواطن جالس فى بيته ينتظر ما وعدتنا به
فهيهات ان تتقاعس او تتكاسل فى فعل شئ ينهض بتلك البلد وبشعبها
سياده الرئيس
انا مش قصدى اهينك او اهددك بكلامى
سياده الريس
اصلك لما تنام ودمعتك على خدك وانت شايف بلدك كل يوم بتنحط اكتر من الاول
ولما تلاقى طفل مات لمجرد انه شم هوا بلده اوشرب من مايه نيلها
ولا اكل من ارضها
امال عايزينه ياكل ويشرب من اين ولا الاسم مولود فيها وابسط حقوقه مش لاقيها
لا هو طالب قصر وعربيه ومدرسه اخر مودرن ولا عشوه فى مطعم اخر جنان
كل اللى طالبه هو وغيره يلاقوا لقمه نظيفه...... هوا نظيف..... مايه بجد تصلح للشرب
سياده الريس
لما يجيلك ضيف ومش عارف تعمله كوبايه شاى على الاقل لانك مش لاقى غاز ...... عندك بدل الانبوبه اتنين بس فاضيين.... ولو لقيت الانبوبه تلاقيها ب20 و50
سياده الرئيس
المواطن المصرى راضى بأقل حقوقه بس هى تتحقق
سياده الرئيس
اتمنى انك تاخد حق كل شهيد ضحى عشان بلده واستشهد فى التحرير
ولا اللى عينه راحت فى محمد محمود
ولا اللى انتهكت حقوقها بجريمه كشف العذريه
ولا اللى منزلش اساسا من بيته وقاعد مرعوب على اهله وولاده
ليدخل عليه شويه بلطجيه ويدبحوهم
ياسياده الرئيس
الشعب ده شعب مفيش اجدع منه ولا اطيب منه ..... هو بس عايز يحس انه فى بلده وان حقه مش مهضوم ولا حاجه
وانه لما يحب يخلص مصلحه له ميتبهدلش بين المصالح الحكوميه .....ويقف قى طابور بالساعات وفى الاخر يلاقى نفسه لسه قدام الاسنسير
سياده الرئيس
انا مش هظلمك زى غيرى واقول ده هيعمل فينا وهيسوى..... انا هصبر واصبر ما انا ياما صبرت جت عليك
سياده الريس
انا هديك فرصه وبدل السنه سنتين
بس صدقنى ياريس الشعب على اخره يعنى مش ناقص ديكتاتوريه وظلم وفساد وادويه مسرطنه وهجره شباب للخارج باحثين عن عمل ويلاقوا نفسهم مجرد جثث فى الميه
سياده الريس
خلى مصر ترجع لاصلها ....ده مصر ام الدنيا
شبابها اللى قاعد على القهاوى والكافيهات مش شباب سيس ولا حاجه ولا شباب ضايع
هو بس مستنى الفرصه ومستنى اللى يقوله الشغل اهو قوم واشتغل وهو هيبدع فى شغله مهما كان مركزه
كلمه اخيره سياده الريس
انا مجرد مواطنه مصريه وانت ممكن اوى ماتخدش بكلامى ولا تهتم بيه
بس كلامى ده هو نتاج قهر وظلم واستبداد
بس كل اللى بطلبه منك انك تعمل اللى يمليه عليك ضميرك وكما تدين تدان
وكل راع مسؤل عن رعيته
فياريت تهتم برعيتك وترعاهم وتحسن ليهم ولبلدهم واللى هى برده بلدك
سياده الريس شكرا جزيلا على الحوار واعرف انى مش هخاف اعبر عن رأى ومش هسكت لو غلطت فى حقى وفى حق بلدى

عايزه اعرف رأيكم فى الموضوع وبكل صراحه واى حد عنده اضافه يتفضل يضفها

NooR El HoDa

سيبينى بعد الماتش هقرأها علشان امخمخ فيها براحتى

مستنيه رأيك

الموضوووووووع جااااااااااااااااااااامد جدا

بس لحد ناو انا شايف ان مرسى شغال مية مية

الجزء دااا

اقتباس :: لا هو طالب قصر وعربيه ومدرسه اخر مودرن ولا عشوه فى مطعم اخر جنان
كل اللى طالبه هو وغيره يلاقوا لقمه نظيفه...... هوا نظيف..... مايه بجد تصلح للشرب

بتفكرينى بجزء من قصيدتى

مش طالب شقة ولا عروسه ولا عربيه

طالب كرامة عزة حرية

حلو الموضوع بجد وان شاء الله الريس الجديد يكون كويس مع انى مكنتش حاباه خالص

انا كمان مكنتش حباه خالص بس اقتنعت فى الاخر ان كل اللى يجيبه ربنا كويس ومش هنشوف اوحش من اللى فات

يشرفنى يارعد ان الكلام يفكر بقصيدتك بس مش مقصوده ولا مترتبه خالص

اقتباس :: يشرفنى يارعد ان الكلام يفكر بقصيدتك بس مش مقصوده ولا مترتبه خالص

الشرف ليا انا وانا اكيد عارف انها مش مقصوده